प्रदेश सरकार
स्वास्थ्य तथा जनसंख्या मन्त्रालय
स्वास्थ्य निर्देशनालय

बेनी अस्पताल

गण्डकी प्रदेश, म्याग्दी, नेपाल

बेनी अस्पतालमा आइसियु कक्ष



भदौ १ गतेबेनी अस्पतालमा सघन उपचार कक्ष (आइसियु) स्थापना गरिएको छ । गण्डकी प्रदेश सरकारले उपलब्ध गराएको एक करोड ७९ लाख रुपैयाँको लागतमा बेनी अस्पतालले २ वटा भेन्टिलेटर सहितको ५ शैयाको आइसियु कक्षा स्थापना गरेको हो । आइसियु कक्ष स्थापना भएपछि जटिल प्रकारका विरामीहरु जिल्ला बाहिर जानुपर्ने बाध्यता हटेको छ ।

जिल्ला अस्पतालहरुमा आइसियु नहुँदा जटिल प्रकारका बिरामीको उपचारमा समस्या भएको भन्दै गण्डकी प्रदेश सरकारको गत बैशाखमा बसेको बैठकले सबै जिल्लामा सघन उपचार कक्ष (आइसियु) निर्माणका लागि बजेट विनियोजन गरेको थियो ।

कोरोना भाइरस कोभिड १९ को संक्रमणलाई समेत मध्यनजर गरेर प्रदेश सरकारले जिल्ला तहमा आइसियु तथा भेन्टिलेटरको अभावमा हुन नदिन आइसियु कक्ष स्थापना गरेको हो । आइसियु स्थापना भएपछि जटिल खालका बिरामीलाई पोखरा र काठमाण्डौं लैजानुपर्ने बाध्यता हट्ने अस्पताल विकास समितिका अध्यक्ष बेलबहादुर कटुवालले बताउनुभयो । आइसियुका लागि आवश्यक पर्ने सबै स्वास्थ्य सामग्रीहरु जडान भाइसकेका छन् ।

तत्कालका लागि आइसियु सञ्चालन गर्न जनशक्ति नभएकाले एकमहिना भित्रमा सञ्चालन गरिने उहाँले बताउनुभयो । तर आपत विपत परेमा तत्कालन कुनै विरामीलाई आइसियुको आवश्यकता भएमा सञ्चालन गर्नसकिने उहाँले बताउनुभयो । एकमहिना भित्र औपचारिक रुपमा सघन उपचार कक्ष(आइसियु)को उद्घाटन गरिने उहाँले बताउनुभयो ।

प्रदेश सरकारले आइसियुका लागि दुईजना जनशक्ति उपलब्ध गराएपछि पूर्णरुपमा सञ्चालनमा ल्याउने अस्पतालले जनाएको छ ।
अस्पतालको नयाँ भवन निर्माणधिन अवस्थामा रहेकाले हाललाई जिल्ला स्वास्थ्य कार्यालयको भवनमा आइसियु स्थापना गरिएको छ । हालैमात्र जिल्लामा पहिलोपटक निशुल्क रुपमा मिर्गौलाको डायलाइसिस सेवा सञ्चालन गरेको अस्पतालमा नयाँ थप सेवासुविधाहरु थपिदै जानथालेपछि सर्वसाधरणहरुलाई राहत मिल्ने अपेक्षा गरिएको छ ।

Download: बेनी अस्पतालमा आइसियु कक्ष